بدأ ماراثون شهر رمضان اللي بتتنافس فيه الشركات الكبرى على تقديم الحملات الاعلانية لتسويق منتجاتهم وخدماتهم, خصوصا إنه أكتر وقت في السنة بتزيد فيه نسبة متابعة التليفزيون و مشاهدة الإعلانات و المسلسلات والبرامج.

الـــ Creative team في المؤسسات وشركات الدعاية والاعلان بيحاول كل سنة يخلق أفكار وأنماط جديدة ومميزة بعد ما بقت معظم تيمات الإعلانات معتادة ومعروفة للمشاهد زي النوستالجيا، لمة العيلة والأصدقاء ،خفة الدم ، الأغاني القديمة والشخصيات الفنية سواء الممثلين أو المطربين اللي رحلوا عنا وأثروا فينا……

“وحشتنا اللحظة..وحشتنا اللمة لحد ماترجع.. هنقربك ليها”

من أقوى الإعلانات اللي لفتت نظرنا وحبينا نحللها ونشارككوا رأينا فيها هو إعلان شركة Orange 2020 اللي رفعت شعار #وحشتنا_اللمة مع صوت المطرب حسين الجسمي اللي قدر بمنتهى السلاسة إنه يفكرنا بكل الذكريات والمشاعر الجميلة والناس اللي بنحبهم وافتقدناهم الأيام دي خصوصاً مع صعوبة فكرة التجمعات العائلية والعزومات خلال فترة الحظر والظروف اللي بيمر بيها العالم كله.

“في 1000 طريقة تقدر تعبر بيها لكل اللي بتحبهم عن اهتمامك مهما بعدت المسافات ما بينا”

دي الفكرة البسيطة اللي اشتغل عليها الإعلان وقرر الــ Creative team إنه يوصل الــ message بتاعته من غير ما يستعينوا بمشاهير ونجوم الصف الأول زي ما عملت الشركات المنافسة ليهم.

فكرة الاعتماد علي ناس عادية شبهنا فيها تحدي وجرأه كبيرة في نفس الوقت ، فغالباً إحنا بنتعلق بالاعلانات علشان بيكون فيها فنانين بنحب نشوفهم وبنبقي مستعدين نتفرج على الإعلان ونكرره أكتر من 10 مرات في اليوم الواحد علشان نستمتع بيهم وده اللي بتلعب عليه الإعلانات كل سنة وبينافسوا بعض في إنهم يستعينوا بأهم النجوم سواء المصريين أوالعالميين كمان.

لكن الاختيار ده جه في صالح فكرة إعلان Orange تماماً فقدروا بسهولة إنهم يعلقوا المشاهدين بناس بسيطة تشبههم وعندها نفس تفاصيل حياتهم ويومهم وده أهم سبب خلى الإعلان قريب للناس ويوصل بسرعة لقلوبهم بعد ما نجح إنه يرجعهم لذكريات حلوة عاشوها في حياتهم مع ناس قريبين منهم برغم المسافات الطويلة اللي بعدتهم.

هل نجح إعلان Orange في تحقيق هدفه؟

ضم إعلان أورانج لحظات إنسانية حقيقية وصادقة من غير أي افتعال أو تمثيل وأجواء مبهجة خلال دقيقتين و26 ثانية بس.

فإختار إنه يلعب على “الجانب العاطفي للمشاهد” فبنشوف الأم اللي اشتاقت لإبنها في الغربة وبتتطمن عليه والجد اللي بيشارك حفيدته لحظة وقوع سنتها بمنتهى الفرحة والسعادة من خلال كاميرا موبايله والزوجة اللي افتقدت زوجها وفرحة الأصدقاء بمقابلتهم بعد غياب سنين طويلة.

إيه الـ Marketing objective اللي اختارته Orange وقررت إنه يكون بداية فكرتها لإعلانها الرمضاني؟

كل شركة لما بتقرر إنها تعمل إعلان جديد للخدمة أو المنتج الخاص بيها بيكون عندها Objective محدد بتشتغل عليه علشان توصل لل customers بتوعها بسهولة و بالتالي الرسالة التسويقية تحقق هدفها.

الهدف التسويقي الواضح أو المباشر من الإعلان هو Brand positioning فهي من البداية اختارت عبارة “بنقربك للي يهمك” فالشركة هنا مش بتروج لعرض جديد أو عايزه تزود مبيعاتها.

ولكن إحنا عندنا وجهه نظر مختلفة إن Orange ليها Indirect objective اختارت الطريقة دي عشان تقدمه بيها وهي إنها بتمهد لحملة تسويقية تانية كبيرة خلال شهر رمضان هتقدم فيها عرض مميز على باقات الأنترنت والمكالمات.

ملاحظاتنا على الإعلان:-

– الفكرة مناسبة للظروف اللي إحنا بنمر بيها خصوصاً بعد تطبيق الحظر وانتشار فيروس كورونا والخوف من التجمعات والعزومات خلى عند كل الناس احساس بالوحشة و افتقاد للناس القريبين منهم وبيحبوهم خصوصاً في شهر رمضان.

-المعالجة البصرية فيها بساطة وذكاء فقدر المخرج يلعب علي فكرة اللمة واللحظة الحلوة مع الناس اللي بنحبهم بمشاهد شاعرية قريبة تظهر مدى الحب ودفء العلاقات
واختار إنه يعبر عن المشاعر دي من خلال أعمار مختلفة فنجد الجد والجدة والحفيد والصديق والأم والأب فبسهولة كل شخص هيقدر يشوف نفسه وهيفتكر لحظة حلوة عاشها مع ناس بيهموه و غاليين عليه.

-اسم الأغنية “سنة الحياه” ليها دلالة قوية فالاعلان بيأكد على فكرة إن بسبب ظروف الحياة الصعبة والتغييرات اللي بنعيشها والتفكير في المستقبل بقي فيه جرأه أكتر في اتخاذ قرار السفر للخارج و الغربة بعيد عن الأهل والوطن من أجل العمل وإن دي بقت سنة الحياة خصوصاً بعد ما سهلت علينا التكنولوجيا وشبكات الاتصالات الحديثة والانترنت التواصل مع أهلنا وأصدقاءنا فعائق المسافة مبقاش موجود من الأساس.

-كلمات الأغنية اللي كتبها الشاعر أيمن بهجت قمر وغناها حسين الجسمي بصوته الحنون مبهجة وخفيفة وقادرة إنها تعلق بسهولة في الإذهان و كان لها دور ملحوظ في توصيل الرسالة وتحقيق هدف الإعلان.

– شبكة Orange قادرة تثبت نفسها بقوة وسط منافسيها وهتقدر تقربك من كل حبابيك وهتخليك تتكلم وتتواصل معاهم مهما كانت المسافة بعيدة ما بينكوا .

حابين نعرف رأيك وملاحظاتك على الإعلان شاركنا في التعليقات وقولنا إيه الإعلان التاني اللي تحب نحلله ونتكلم عنه.