بعد ما حللنا معاكوا إعلان Vodafone Egypt الأسبوع اللي فات، حابين نتكلم الأسبوع ده عن إعلان قطونيل مصر – Cottonil EG ، والمعروف عن المنتج إن إعلاناته كل سنة بتكون محل جدل وخلاف كبير وفي أحيان كتيرة بتوصل لوقف الإعلان ومنعه تماماً من العرض علي شاشات التليفزيون والوسائط المختلفة.
بس إحنا حابين نحلل أكتر الهدف التسويقي اللي بتعمد عليه شركة قطونيل لأكتر من 4 سنوات على التوالي.
بيبدأ الإعلان بظهور حسن شاكوش وعمر كمال ( مغنيين المهرجات المعروفين) وبتبدأ الأغنية بالكلمات دي:-
القوة في خامة بوكسرك
ومحدش يقدر يكسرك
فانلتك هي الأساس
ظابطة جسمك بالمقاس
خلينا نقولكوا إحنا شوفنا إعلان قطونيل إزاي…
ملاحظات على إعلان قطونيل في رمضان 2021
-شركة قطونيل بتعتمد في إعلاناتها الرمضانية على هدف تسويقي واحد وهو الــ Brand gossip ، الـــ Objective الأساسي عندها من الإعلان إثارة الجدل والكلام المستمر على المنتج.
-استعانت قطونيل السنة دي كمان بمغنيين المهرجانات المشاهير والنجم الأوحد للشركة مدحت شلبي صاحب الجملة الشهيرة ( هالا هالا ع الفانلة)علشان تلفت نظر المشاهدين للإعلان وتحقق هدفها التسويقي اللي اتكلمنا عنه ( خصوصاً إن شاكوش وعمر كمال أثاروا الجدل لفترة كبيرة في الوسط الغنائي بسبب أغنية بنت الجيران) فأختيارهم كان في محله عشان يحققوا الهدف ده
-لعب الإعلان على كلمات يبرز من خلالها دور الفانلة لإثبات الرجولة والذكورة واستعان بكلمات لها ايحاءات جنسية واضحة (Controversial notions)
زي (الفانلة للجدعان، والشقاوة وقت اللزوم،قطونيل رمز الرجولة، راحة الواحد طول اليوم)
-على المستوى الفني كان الإعلان في أسوأ حالاته سواء بصرياً أو سمعياً، فهو فقير على مستوي الصورة، الديكور، الفكرة،المضمون، المزيكا مثلما جرت العادة.
حابين نعرف رأيكوا في الإستراتيجية التسويقية اللي بتتبعها قطونيل كل سنة،وإثارتها للجدل من غير ما تعتمد على فكرة إعلانية جذابة… وهل ده ممكن يساعدها إنها تحقق مبيعات بشكل أكبر ولا بينقص من قيمه الـــ Brand بشكل عام؟
