الإعلانات التليفزيونية أصبحت بتهم قطاع وشريحة كبيرة جداً من الجمهور اللي بيحرص علي متابعتها والتفاعل معاها بشكل يومي، وخلال الفترة اللي فاتت حبينا نتابع أراء الجمهور المختلفة في اعلانات موسم رمضان 2020 سواء علي السوشيال ميديا أو في الشارع ، وبعد ما رصدنا التعليقات ووجهات النظر الإيجابية والسلبية ،لاحظنا إن الجمهور المتلقي أصبح عنده نظرة نقدية ووعي كبير للمواد الاعلانية اللي بيتعرض ليها كل دقيقة تقريباً ، وإنه مهتم بالمشاركة وإبداء رأيه الموضوعي فيها .

و من أكتر العناصر اللي لاحظنا إنها لفتت انتباه الجمهور هي إن في إعلانات بيتم عرضها كل بشككل متكرر علي جميع القنوات بعكس اعلانات تانية بيتم عرضها بنسبة أقل بكتير.

طيب ايه السبب في ده؟

الإعلانات التليفزيونية بتتفاوت في كثافة عرضها واستخدامها من معلن لأخر وده بيكون على حسب ظروف السلعة أو الخدمة في السوق واللي ممكن نسميه عمر السلعة وقوتها ،وفي عامل تاني مهم بيتحكم في كثافة عرض الإعلان وهو المنافسة القوية وعوامل الشوشرة اللي بيواجهها المنتج أو الخدمة.

قبل ما نبدأ نتكلم عن الإعلان الجديد النهاردة حابين إنكم تشاركونا وتتفاعلوا معانا بشكل أكبر،
بما إننا ذكرنا ميزة مهمة جداً تخص الإعلانات التليفزيونية وهي كثافة العرض أو الاستخدام وناقشنا معاكم الأسباب اللي بتأثر بشكل كبير علي الخاصية دي ….

هنطرح عليكم عدد من الخصائص اللي بتميز الإعلان التليفزيوني وبيتوقف عليها مدى نجاح الإعلان وتحقيقه لتأثيره المطلوب من عدمه و عايزينكم تطبقوها معانا بشكل عملي على إعلان #Chevrolet_2020 اللي هنحلله بشكل مفصل.
—————————————————————–

من أهم خصائص الإعلانات التليفزيونية :-
———————————-
-الإعلان إيقاعه سريع يشبه إيقاع حياتنا اليومية ومدته الزمنية محدودة وده بيحتاج إلي التركيز والإيجاز في الفكرة و البساطة في المعالجة الفنية.

-الابتكار والتجديد في الأفكار الإعلانية شئ ضروري و بيساعد بشكل كبير في التخلص من مخاطر التشبع الإعلاني اللي بتسبب ملل و انصراف الجمهور,

-الإعلان بيخاطب قطاعات محددة من الجمهور وده بيكون بناء علي خصائصهم وعاداتهم الشرائية والاستهلاكية.

– شخصية المعلن بتكون واضحة في الإعلانات التليفزيونية، ولكن في إعلانات التشويق اللي بتسبق ظهور السلعة أو الخدمة في الأسواق بيكون مخفي ، وده علشان يخلق ليها اهتمام جماهيري ويشجع المستهلكين على استخدامها فور توفرها.

– الإعلانات بتتقسم إلي إعلانات مباشرة وواضحة وأخري غير مباشرة وضمنية زي الإعلانات اللي بتيجي في سياق مواد إعلامية كالبرامج المكفولة والدراما وبرامج المسابقات وكل نمط له وسائله واستخداماته وأهدافه.

– أغلب الإعلانات التليفزيونية بتلعب علي الجانب العاطفي والسيكولوجي للجمهور المستهدف.

-المعلن هنا بيتمتع بحرية كبيرة سواء في الأسلوب اللي بيستخدمه أو الخيال أو حجم الوعود اللي بيقدمها عشان يوصل برسالته للجمهور المستهدف ،فهو مش مضطر إنه يجاوب على كل استفسارات المتلقي بحياد وموضوعية.

– الإعلان بيعتمد علي التكرار علشان يوصل للجمهور المستهدف اللي بيخاطبه و يقدر إنه يحقق الـثأثير التراكمي المطلوب.

-في الإعلان عناصرجذب الانتباه والاهتمام ضرورية ومطلوبة فالمعلن هنا هو اللي بيسعي وراء المعلن إليه.

———————————————————————

ملاحظات علي إعلان #Chevrolet_2020 :-

مدة الإعلان دقيقة و 28 ثانية

-اعتمد إعلان شيفروليه علي الأسلوب الدرامي من خلال خلق موقف/ قصة بين النجميين (أحمد حلمي ومنى ذكي)، قدر المعلن من خلاله إنه يثير انتباه واهتمام الجمهور و يبرز ميزة الإتساع في السيارة والحاجة لاستخدامها في المواقف الحياتية المختلفة ، فبدأ الإعلان بإنه خلق لينا مشكلة درامية و قالنا إن سيارة شيفروليه هي الوسيط والحل المجزي لتجاوز الموقف.

-استعان الإعلان بالثنائي المحبوب أحمد حلمي ومنى ذكي ، وكان اختيارمميز وداعم بشكل كبير لإيصال الفكرة بالأسلوب المطلوب ونجاحها عند المتلقي، فالنجوم لهم طابع مميز وبيأثروا بشكل كبير علينا كجمهور عنده نزعة استهلاكية وحب لتقليد الغير,

-“Space to spare”

الجمهور المستهدف من الإعلان محدد بشكل دقيق ونلاحظ ذلك بداية من اختيار الـــ Slogan و طريقة كتابته باللغة الانجليزية، و نجوم الصف الأول اللي تم الاستعانة بهم ليكونوا أبطال الإعلان فضلاً عن اختيار الملابس ، فالإعلان موجه إلى الطبقات الراقية ذات المستوى الإجتماعي والإقتصادي المميز.

-هدف الإعلان بيعي وتسويقي ،فهو يقدم الموديل الجديد من سيارات Chevrolet 2020 المميزة ،وبيعرض المزايا اللي بتتمتع بيها واللي هتقدر تخلصك من مشكلة صغر الحجم وضيق مساحة السيارة واستيعاب الأشخاص -Space issues- ، وهنلاحظ إنه لم يذكر سعر السيارة أو نظام الدفع أو منافذ البيع وغير ذلك.

-طبيعة المنتج واضحة منذ بداية الإعلان فيتم إبراز شكل السيارة من جميع الجوانب عندما تتحرك ،ونشيد بإختيار اللون الأحمر الجذاب علي وجه التحديد فهو لون catchy ومثير للمشاهد بشكل مذهل وفقاً لسيكولوجية استخدام Color pallete التي وضعها علماء النفس والمهتمين بتحليل عناصر الإعلان والصورة البصرية.

-تم توظيف كل العناصر الفنية في الإعلان بشكل جيد بداية من الصورة الجذابة وزوايا التصوير والإضاءة والألوان المناسبة لطبيعة المنتج المعلن عنه ، واختيار أماكن التصوير زي Parking ، النفق ، محطة البنزين والشوارع.

استخدام جيد لشريط الصوت زي المزيكا والمؤثرات الصوتية و الحوار اللي حصل بين الزوجين اللي كان ليه دور كبير إنه يساهم في تحقيق هدف الإعلان في سياق خفيف الظل ، فقدر المعلن إنه يبرز اتساع السيارة ومدي استعابها لأكبر عدد من الأشخاص بجملة “إحنا محتاجين نبعد” وبعدها بتنتقل بطلة الإعلان للكرسي الخلفي بعيد عن زوجها.

ما أسباب عدم تركيز اعلان #Chevrolet_2020 علي تكلفة السيارة ومنافذ بيعها وغير ذلك من التفاصيل اللي بتهم العملاء الحاليين أو المترقبين وقد تعتبر عناصر هامة تدفعهم للشراء؟