كتير مبتبقاش عارف وبتسأل بعد ما بيخلص الإعلان في التليفزيون هو إيه المنتج ده!

هما عايزين يعلنوا؟ عن إيه؟ أنا معرفتش في الآخر!

أنت كمان ممكن تكون حافظ أغنية الإعلان أو الـSlogan بتاعه وعمال تردده طول الإعلان!

أفتكرت كام إعلان دلوقتي حصلك معاه كده وأنت بتقرأ؟

دي مشكلة كبيرة جداً بيقع فيها معظم المعلنيين و الـCopywriters

وهي إنهم بيحطوا كل تركيزهم علي الإبهار البصري والألوان وكلمات الأغاني اللي هتعلق مع المشاهدين وبيتجاهلوا تماماً إنهم يبروزوا المنتج أو الخدمة اللي هما بيعلنوا عنها

الهدف الأول من أي إعلان تجاري Commercial, هو ترويج وبيع المنتج بأسلوب جذاب يلفت انتباه المشاهدين عشان ياخدوا القرار الشرائي بتاعهم في النهاية

وهنا لازم تسأل نفسك إيه مدى تأثير الرسالة الإعلانية عليك؟ هل نجحت إنها تأثر علي سلوكك وقرارك الشرائي واقنعتك بالمنتج اللي بتعلن عنه ولا لأ؟

حبينا نلفت نظركم في البداية لكام نقطة مهمة جداً قبل ما نبدأ في تحليلنا النهاردة لتاني إعلان في رمضان FRESH 2020

الدنيا مليانة إختيارات ..إنما أجهزة البيت مافيهاش #يأما_فريش_يأما_بلاش

دي بداية إعلان فريش اللي بدأ عرضه في ماراثون إعلانات شهر رمضان 2020 منذ أيام وبعدها بتبدأ أغنية بتقدم منتجات فريش المختلفة

مدة الإعلان :- 55 ثانية.

ملاحظات على الإعلان:-

– الهدف من الإعلان تسويقي بحت فالاعلان استخدم كل العناصر اللي هتساعده على تسويق المنتج وزيادة المبيعات عن طريق إنه يقنع المستهلك بتكرار شراء السلعة أو إنه يخوض التجربة و يشتريها لأول مرة

– هو ده إعلان إيه؟!

من أول لحظة في الإعلان المشاهد بيعرف يحدد إيه هو المنتج اللي بيتم الإعلان عنه، الاعلان بيقدم منتجات فريش الخاصة بأجهزة البيت الكهربائية و في تركيز واضح من البداية علي تثبيت ال Tagline الخاص بفريش في ذهن المشاهد ” يا أما فريش يا إما بلاش” وبيأكد بعد كده على أسباب الثقة في المنتج.

زي الأمان والصيانة والضمان والتنوع وطبعاً دي نقطة قوة تحسب ليهم.

– الـTone of Voice بتعتمد على أسلوب النصح والإرشاد للعميل ،فشعور المستهلك إنه مهم بالنسبة للشركة وإنها بتحاول توفرله أفضل جودة وخدمة ممكنة ده بيخليه عنده ولاء ناحية المنتج و يتعلق بيه أكتر وقبل كل ده هيكون مهتم إنه يكمل الإعلان للأخر>

– المعلن استخدم الأسلوب الغنائي الراقص علشان يثير اهتمام المشاهدين بشكل جذاب يتلاءم مع خصوصية المنتج أو السلعة اللي بيقدمها في الإعلان.

– نجح في توظيف الصوت و استخدم أغنية مرحة وخفيفة لحنها مميز وكلماتها بسيطة مرتبطة بمنتجات فريش اللي بيعلن عنها علشان تعلق بسهولة في الإذهان

كلمات الأغنية والمصطلحات اللي تم استخدامها بتأكد إنه بيوجهه إعلانه للمستهلكين من طبقات وشرائح مختلفة فنلاقي كلمات زي ( décolleté/أوبلتات ، بطرمان/برطمان ، كركديه/ ميلك شيك ، هستشور شعري ولا هفرق من النص.

– الصور مبهجة للعين! تم استخدام Color Pallate مبهجة فألوان الإعلان كانت ما بين الأحمر والأصفر والبرتقالي والأخضر والأبيض والأزرق ده بالأضافة للـGraphics الممتعة وحركة الكاميرا الناعمة.

– مهم جداً إن المعلن يكون عارف كويس مين هو جمهوره المستهدف -Target Audience- ، يعني يحدد هو عايز يوصل بإعلانه لمين..

هنلاقي الإعلان هنا أعتمد علي العنصر النسائي واختار بعناية شديدة الملابس وألوانها وحركات الجسم وده يعتبر من أقوى وأهم عناصر جذب الانتباه خصوصاً إن طبيعة المنتج المعلن عنه تسمح بكده.

التأكيد على توفر كل الأجهزة المنزلية اللي هتلبي احتياجات واستخدامات العملاء سواء الغسالات ، الثلاجات ،السخانات ، البوتوجازات…

ما نعيبه وننتقده هو تكرار تيمة الإعلان فلو قارنا بين الاعلان ده وإعلان رمضان 2019, هنلاقي إنهم استخدموا نفس العناصر تقريباً اللي اتكلمنا عنها الأغنية الجذابة والألوان والاعتماد بشكل رئيسي على الجنس الناعم فالإختلاف الوحيد هو الاستعانة بالمذيع المشهور معتز الدمرداش.

شاركنا في التعليقات وتخيل فكرة أو تصور مختلف تماماً لإعلان فريش 2020 من وجهه نظرك تحقق من خلاله الهدف البيعي المطلوب حتى لو قررت إنك تكتفي بنص أبيض وأسود بس علي الشاشة ترويجًا للمنتج… جميع الأفكار مقبولة.