“تحليل الإعلان قائم على مناهج ودراسات علمية خاصة بكيفية تسويق المنتجات والخدمات لإبراز نقاط القوة والضغف في المحتوى الإعلاني بشكل احترافي دون التطرق إلى المستوي الإجتماعي والفروق الطبقية وما إلى ذلك لذا وجب التنويه”

نحن مطاردون!
شاشات التليفزيون تطاردنا وتقتحم بيوتنا كل يوم بسيل مهول وجرعة مكثفة من الحملات الإعلانية خصوصاً خلال شهر رمضان ، وهنا كل معلن بيبدأ يختار أسلوب أو طريقة تخصه تماماً يثير بيها انتباه واهتمام المشاهد ويلفت نظره للمنتج أو الخدمة اللي بيقدمها.
الأساليب الإعلانية كلها بتكون متاحة و بتعمل على خلق صورة ذهنية معنية -Image- عن المنتج أو الخدمة اللي بيتم الإعلان عنها ، قد يلجأ المعلن لأسلوب بسيط وجذاب فيه خفة وذكاء أو أسلوب ال Reverse marketing أو يقرر إنه يستخدم أسلوب تنافسي مختلف تماماً وهو إثارة استفزاز المشاهد علشان يضغط عليه ويخليه ياخد القرار الشرائي بتاعه.

النهاردة هنحلل و نتكلم معاكم عن تالت إعلان في رمضان” إعلان مدينتي” اللي سبب ضجة كبيرة و اتعرض لحملات سخرية شرسة علي السوشيال ميديا.
قبل الدخول في تفاصيل الإعلان وملاحظاتنا عليه شاركونا بالإجابات على الأسئلة دي….
-إيه الشعور أو الإنطباع الأول اللي سابه عندك إعلان مدينتي؟
-بناء على وجهه نظرك كمتلقي ومستهلك هل الأسلوب الإعلاني اللي استخدمه كان دافع قوي ليك علشان تستجيب للرسالة المقصودة بشكل إيجابي ولا خلاك تنفر تماماً من الإعلان وبقيت مش حابب تشوفه تاني؟!
————————–
الإعلانات التليفزيونية بتعتبر انعكاس صريح للواقع اللي إحنا بنعيشه ولظروف المجتمع سواء الاجتماعية، الاقتصادية، الثقافية ،….. وكل إعلان بيحاول إنه يوصل للمتلقي بال Tone of voice والملامح والسمات اللي هتناسبه وهتتجاوب معاه علشان الاعلان يحقق هدفه المطلوب في النهاية.
إزاي إعلان مدينتي نجح بشكل كبير إنه يحقق ده؟
-الإعلان بينقل صورة حية مميزة لمدينتي وبيستعرض فيها كل تفاصيل وعناصر الرفاهية والجمال.
-استخدم الإعلان أسلوب الشهادة اللي أثبتت الدراسات والأبحاث إنه قادر على جذب الانتباه بنسبة 17% وإن المشاهدين بيرتبطوا بالشخصيات عاطفياً.
فهنلاقي إن شخصيات الإعلان كلها من سكان مدينتي والرحاب وماكنش فيه أي استعانة بالمشاهير سواء نجوم الفن أو الرياضيين أو الخبراء وده خلي في مصداقية أكتر وهما بيحكوا عن تجربتهم السكنية.

– الشخصيات اللي ظهرت في الإعلان مختلفة سواء في أعمارها أو جنسها ( ذكور وإناث) و لكن بيتفقوا كلهم في المستوى الإجتماعي والثقافي والإقتصادي المتميز وده اللي بيأكده الإعلان “الناس كلها هنا شبه بعض وال community حلوة أوي”.

-“إنت النهاردة في مكان مش موجود في أي حته لا في مصر ولا برة مصر” دي أول جملة بدأ بيها الإعلان وجت علي لسان أحد الشخصيات أثناء قيادته لسيارته الخاصة ، فالمعلن عارف كويس أوي إعلانه موجهه لمين وإيه الفئة اللي هو بيستهدفها من البداية (A class).

-الهدف التسويقي – Brand positioning- فالإعلان هدفه إنه يرسخ صورة ذهنية معينة عند المشاهدين وإنه يبرز مستوي الخدمة العالمية والرفاهية اللي بيتمتع بيها سكان مدينتي من غير ما يذكر تماماً أسعار الوحدات أو طرق الدفع و استخدم عناصر تانية عبر بيها بشكل غير مباشر عن التكلفة / سعر الخدمة اللي بيقدمها زي Brands السيارات مثلاً.

-استخدام أسلوب المبالغة في النص الإعلاني علشان يبرز بيه الرخاء والنقلة النوعية اللي بيشعر بيها كل سكان مدينتي في أسلوب معيشتهم وروتينهم اليومي.
فنلاقيه استخدم عبارات زي ( بيحول الرمل لدهب /حول المكان الميت لجنة/ أول ما بدخل مدينتي بحس إني دخلت مكان تاني في دنيا تانية / …. ).

-التأكيد علي ال Slogan “بناه المستقبل”من خلال كل عناصر الإعلان اللي ساهمت بشكل كبير في تحقيق المعنى ده زي الصورة البصرية فكانت أغلب زوايا التصوير -Top angle /Bird eye – استعرضت جمال مدينتي وأكدت على مطابقتها لكل المواصفات والمقاييس العالمية ده بالإضافة لشريط الصوت و الموسيقي التي تم استخدامها في الخلفية.

– مدينتي هي الاختيار الأمثل بالنسبة ليك علي جميع المستويات وبيبدأ الإعلان بعد كده يعدد مزايا المشروع- التجمع السكني
( التنظيم ، الخصوصية ، الأمان ، المساحات الواسعة بين البيوت، مافيش تلوث، الهدوء، المساحات الخضراء، Kids area ، كل الخدمات الترفيهية والاستهلاكية والصحية متوفرة علي بعد 5 دقايق ….).

فهو بيلعب بشكل صريح وواضح على احتياجات العملاء ورغباتهم وبيأكد إن كل ده متوفر وموجود في مكان واحد بس وهو مدينتي.

-لم يستخدم أغنية ترويجية بعد الهجوم العنيف اللي اتعرض ليه العام الماضي بسبب كلمات أغنية الإعلان ولحنها وطريقة أداء المطربة أصالة اللي وصفها الجمهور بأنها ملحمية ومبالغ فيها ومش مناسبة تماماً للفكرة.
-مدة الإعلان طويلة تجاوزت 3 دقايق وكان من الأفضل أن تقصر مدته الزمنية إلى دقيقة ونصف.

من وجهه نظرك إيه أسباب الهجوم المتكرر على الحملات الإعلانية لهشام طلعت مصطفي وبالتحديد إعلان مدينتي 2020 رغم تميز كل عناصر الإعلان وتوجيهه للجمهور المسهدف المعني؟