قادرين معاكم وبيكم نعدي أي صعب
خبراء التسويق والإعلان بيبحثوا بشكل مستمر عن أفكار تسويقية مبتكرة ومتجددة تجذب انتباه المستهلكين وتشجعهم علشان ياخدوا القرار الشرائي تجاه المنتج أو الخدمة اللي بيقدموها.

ومن أكتر التيمات اللي بيستخدمها المعلنين في الإعلانات التجارية -Commercials- هي تيمة ال-Nostalgia- أوالحنين إلى الماضي ، فكل إنسان مرتبط بمجموعة من الذكريات اللي بيعتبرها جزء من كيانه وتكوينه الشخصي وبتقدر إنها تأثر فيه بشكل أو بأخر بمجرد ما بيسترجعها وفي أحيان كتيرة بيتمني إنه يعيدها ويعيشها مرة تانية.

أثبتت الدراسات والأبحاث العلمية إن استخدام النوستالجيا في الاعلان التليفزيوني يجذب الانتباه بشكل مذهل وبيساعد في وصول الرسالة الإعلانية للجمهور والتفاعل معاها وتحقيق الهدف الإتصالي المطلوب.

إزاي بيتم استخدام وتوظيف النوستالجيا في الإعلان التليفزيوني؟

يلعب المعلنون على الجانب العاطفي والنفسي عند المشاهدين خصوصاً جيل التمانينات والتسعينات بإعتبارهم قوة شرائية كبيرة وأهم شريحة في الهرم الاستهلاكي للمنتجات والخدمات دلوقتي، فبدأوا يربطوا في تيمة النوستالجيا بين الصورة والصوت والحركة بأسلوب قريب من البيع الشخصي و يوظفوا شخصيات مشهورة وأغاني وألحان واستعراضات مرتبطة بالجيل ده واتعلق بيها في الماضي واتحفرت في ذاكرته لسنين طويلة علشان يبنوا رسائلهم الإعلانية الناجحة الخاصة بمنتجاتهم وخدماتهم اللي بيقدموها.

هنحلل معاكم إعلان “صيدليات 19011” في ماراثون إعلانات رمضان 2020 اللي استخدمت بشكل صريح تيمة النوستالجيا علشان تروج بيها لمنتجاتها.

ملاحظاتنا علي الإعلان:-
مدة الإعلان: دقيقتين و27 ثانية.

-“حبة حاجات موجودة بينا من سنين …حبة مواقف ذكريات بتجيب حنين ”

يبدأ الإعلان بصوت الفنان مصطفي قمر بأغنية ليها طابع حنون يسترجع فيها ذكرياته الجميلة مع أصدقائه وأبناء جيله ” إيهاب توفيق وحميد الشاعري وهشام عباس” اللي بنشوفهم في البداية من خلال الصور الفوتوغرافية علي الحائط وشرائط الكاسيت قبل ظهورهم في الإعلان.

– بيتم توظيف تيمة النوستالجيا من أول ثانية في الإعلان من خلال العناصر البصرية المختلفة سواء الإضاءة ، الألوان ، الاكسسوارات زي بوسترات الافلام ، الكتب ، التليفزيون الصغير الأبيض والأسود ،لعبة بنك الحظ والسلم والثعبان دون أن نعرف طبيعة المنتج أو الخدمة اللي بيعلن عنها الرباعي أشهر مطربين الغناء في جيل التسعينات.

-نجح الإعلان بإعتماده على الأسلوب ده في التسويق إنه يظهر اهتمام العلامة التجارية بالأجيال المختلفة من عملائها وحرصها على تحسين وتعزيز صورتها الذهنية عند المستهلك.

#مع_بعض_قادرين
-الهدف التسويقي من الإعلان Brand positioning فالمحتوي الإعلاني بيرسخ اسم صيدليات 19011 وقدرتها علي المشاركة المجتمعية في ظل الظروف الصعبة اللي بيعاني معاها العالم كله،

وفي نفس الوقت هناك هدفي بيعي من خلال ذكر ال Hotline لمجموعة الصيدليات وهو نفس اسمها 19011 و عدد فروعها 300 فرع على مستوي محافظات مصر لخدمة العملاء في أي مكان.

-يستخدم الإعلان الأسلوب الغنائي في الترويج لمنتجات صيدليات 19011 من خلال أغنية بسيطة لها هدف إنساني ولكن نعيب لحنها الإيقاعي المكرر، فنري إنها لم تضيف أي شئ لرصيد المطربين أصحاب التاريخ الطويل خصوصاً إنه كان من المتوقع أن يجتمعوا في عمل أقوي يليق بقيمتهم الفنية.

-وظف الإعلان الصورة بشكل جيد على مستوى الإضاءة والتكوينات واعتمد على مشاهد ولقطات منسجمة بتجمع بين الأصدقاء يستعيدوا فيها ذكرياتهم الجميلة في فترة شبابهم وبداية مشوارهم في الفن ولعب المزيكا ولقطات أخري في مستشفي وهم يرتدون الكمامات الطبية ويلتقطوا الصور مع مجموعة من الاشخاص
شعرنا إن لقطات المستشفي مقحمة علي الإعلان ولم يتم توظيفها بشكل جيد وإنها مجرد استغلال للظروف اللي بيعاني منها العالم كله بعد انتشار وباء كورونا Covid-19.

-فكرة الإعلان و المعالجة قدرت بسهولة إنها تعلق المشاهدين بالأغنية والأجواء ومطربين التسعينات اللي ارتبطوا بيهم في فترة كبيرة من حياتهم ولكن هل تحقق هدف الرسالة الإعلانية؟!

من وجهه نظرنا لا لاسباب كتيرة أهمها إن الاستعانة بالنجوم الأربعة جذب الانتباه للاعلان واعادنا لذكريات جميلة ولكنه في نفس الوقت شتت تركيزنا وانتباهنا عن السلعة أو المنتج اللي بيتم الاعلان عنه خصوصاً إنه ذكر مع ال slogan بشكل هامشي مسطح.

هل تتفق معنا إن أسلوب المعالجة ضر المحتوى الإعلاني وشتتنا كمشاهدين عن هدفه المقصود؟