إمتى أخر مرة شوفت فيها إعلان في التليفزيون وحسيت إن فيه نشاز ، أو خلينا نقول التعبير بشكل تاني ، حسيت إنه مافيش هارموني بين العناصر بتاعته رغم إنه متقن وجيد على مستوى الفكرة والمعالجة البصرية؟
كتير من المعلنين والــــــــــ Copywriters بيقعوا في مشكلة النشاز من غير ما ياخدوا بالهم منها ، خلينا نفكر مع بعض إيه سبب حدوثها في الإعلانات التجارية المختلفةّ؟!

الـــ Copywriter من أول ما بيجيله الـــ Brief وبيدأ يدور على فكرة مناسبة تحقق هدف الإعلان بتاعه أيا كانت السلعة أو الخدمة اللي بيروج ليها ، بيكتب كل التصورات والمعالجات اللي بتيجي في دماغه وبعدها بيشوف إيه هو الأسلوب الأنسب اللي هيستخدمه في الإعلان ، وإذا كان هيستعين بأغنية أو استعراض ولا هيكتفي بالــ ــ Voice over مثلاً.

في المرحلة دي هو بيلاقي نفسه بين كم كبير جداً من الإختيارات والبدائل المتاحة قدامه وبيبدأ من هنا يوظفها بشكل مناسب يخدم رؤيته وتصوره.
خلينا نسأل دلوقتي، طيب النشاز أو عدم الانسجام ده بيحصل إزاي؟
ممكن فكرة الإعلان تكون مختلفة وقوية جداً ولكن صناع العمل يفسدوها بإختياراتهم الخاطئة سواء الإضاءة و الألوان ، استخدام المشاهير غير المبرر ، الأغنية أو صوت المطرب، قطعات المونتاج الحادة المزعجة لعين المشاهد، وغير كده في عناصر كتيرة ممكن تسبب الإحساس ده عند المتلقي وميكونش عارف فين المشكلة بس هو مش بيحب يشوف الإعلان ولا يكرر مشاهدته.

—————————
هنحلل معاكم النهاردة إعلان #العربي2020 وهنتناقش في كل عناصره الإيجابية والسلبية بشكل مفصل.

#حب_الناس_هو_الأساس

مدة الإعلان دقيقة و45 ثانية
-يبدأ الإعلان بجملة “جميع المشاهد حقيقية من بيوت مصرية ، أنتم من قام بتصويرها وأنتم أبطالها
مع صوت المطرب محمد عدوية يغني بصوته المميز هذه الكلمات
“بالحب يعلو المقامُ ويرفع
ُ وتدنو المباعدُ والمقاصد اجمعُ
فأجعل حياتك بالحبِ عامرةٌ
وكن لغيرك سنداً في الحياة ومرجعٌ”

-وظف الإعلان استخدام السوشيال ميديا بشكل جيد جداً ، بداية من كتابة Post “جميع المشاهد حقيقية من بيوت مصرية …. “على صفحة الفيس بوك الخاصة بشركة #العربي وهي نفس الجملة اللي بدأ بيها الإعلان ، وبعدها نتابع مشاهدة اللقطات والمواقف الحياتية المختلفة في بيوت الأسر المصرية باستخدام live video و chatting.
عبر الإعلان هنا عن سيطرة مواقع التواصل الإجتماعي على حياتنا وتضاعف اهميتها بشكل أكبر بعد أزمة كورونا.

-المشاهد اللي تم تصويرها و إختيارها في الإعلان جاءت حميمية وصادقة علشان كده قدرت بسهولة إنها تمس مشاعر المشاهدين بشكل كبير في ظل فترة الحظر والحجر الصحي اللي بنعيشها كلنا وبعدت المسافات ما بينا وبين أحبائنا ، فالمشاهد كلها بتضم تجمعات عائلية لأسر مصرية من طبقات إجتماعية مختلفة بيشاركوا بعضهم في تزيين بيوتهم لحلول شهر رمضان ،مشاركة أطفالهم في اللعب،الاحتفال بأعياد الميلاد ، ممارسة الرياضة، الطبخ ….

-استخدم الإعلان التعليق الصوتي -Voice over- مع صوت المزيكا، وجاءوا مناسبين تماماً لروح الإعلان وهدفه ، فقدر من خلال العناصر دي إنه يدعم فكرة الحب والسند بين الناس وبعضهم ، فنلاقيه اختار جمل حوارية قصيرة ومتناغمة في نفس الوقت زي “طول ما بنحب لبعض الخير، الدنيا هتلف وتدور ،طول ما قلوبنا ماليها النور،هنفرق ونسيب تأثير، هنعدي ونكمل …..

-الهدف من إعلان #العربي دعم فكرة المشاركة المجتمعية والمساندة في وقت الأزمة اللي بنعيشها، فهو مش بيروج في الإعلان عن منتجاته الجديدة أوخدمات ما بعد البيع اللي بيقدمها للمستهلكين ، ولكنه اكتفى هنا إنه يحقق هدف إنساني ويترك أثر جميل عند كل مشاهدي الإعلان مع التأكيد على الـــ slogan الخاص بالشركة ” #صناع_الثقة“.

-نتنقد في الإعلان بعض العناصر زي كلمات الأغنية التي بدأ بيها الإعلان ، ودي العامل الأساسي اللي سبب النشاز اللي كنا بنتكلم عنه في البداية ، فكلمات الأغنية رائعة ولكن الفصحي وطريقة الأداء مش مناسبة لفكرة الإعلان وروحه وإن كانت أفضل بعد كده في الجزء التاني من الأغنية “هنعدي ونكمل وهتبقي أحلى من الأول….”

الفكرة مكررة وتشبه معظم إعلانات رمضان في 2020 ، لو راجعنا الإعلانات مرة تانية سواء اللي حللناها معاكم أو غيرها هنلاقي إن التيمة بتتكرر ( Video calls ، Chatting ، الصور ، المسافات البعيدة ، المشاركة ،السوشيال ميديا ، الموبايلات ) ده بالإضافة إلى تكنيك المونتاج فطريقة قطع وتركيب اللقطات تشبه الإعلانات اللي تناولت نفس الفكرة حتى إننا شعرنا إنه نفس المونتير أو المخرج.

المرة الجاية هنحلل معاكم الجزء التاني من إعلان #العربي2020 بس حابينكم تشاركونا أرائكم في التعليقات وتقولوا إيه ملاحظاتكوا وانطباعتكوا عن الإعلان اللي اتكلمنا عنه النهاردة؟